Mainan Zazzau yayi taron Gaggawa a Zariya

Daga Idris Umar, Zariya

Professor Muhammad Sani Bello ya gudanar da wani taron gaggawa tare da shugabannin jam’iyyar African Democratic Congress na Shiyya ta Ɗaya, mai ƙunshe da mazabu 87 da ƙananan hukumomi 8, a ƙaramar hukumar Sabon Gari da ke jihar Kaduna.

An gudanar da taron ne a babban ɗakin taro na Dove Center da ke Kwangila a Zariya, inda aka haɗa manyan shugabanni da mambobin kwamitin zartarwa (EXCOs) na jam’iyyar ADC daga Zone One baki ɗaya.

Taron ya mayar da hankali wajen ƙarfafa haɗin kai tsakanin shugabannin jam’iyyar tare da tsara dabarun yakin neman zaɓe gabanin zaɓen fidda gwani (Primary Election) da za a gudanar a ranar Litinin, 25 ga Mayu, 2026.

Haka kuma, taron ya jaddada kudirin jam’iyyar na samar da ingantaccen shugabanci tare da wayar da kan shugabanni kan wasu matsaloli da ake zargin suna faruwa a cikin jam’iyyar ADC a faɗin jihar Kaduna.

A jawabinsa, Mainan Zazzau ya bayyana cewa manufar taron ita ce samar da haɗin kai da daidaito a cikin jam’iyyar, tare da neman goyon bayan shugabanni domin tabbatar da nasararsa wajen zama ɗan takarar gwamna guda ɗaya na jam’iyyar ADC a jihar Kaduna.

Rahotanni sun nuna cewa Farfesan ya bai wa shugabannin jam’iyyar na mazabu 87 da ke Zone One amanar kuri’arsa tare da neman amincewarsu kai tsaye.

Daga cikin manyan baƙin da suka halarci taron akwai:

Aliyu Makarfi, Daraktan Kamfen

Gambo Sakadaɗi

Murja Abdul Hasan, Shugabar Mata ta Zone One

Haka kuma, daga cikin malaman addinin da suka halarci taron akwai Sheikh Surajo Bomo.

An gudanar da taron lafiya kuma an tashi lafiya.